EdTech саласы Қазақстанда қарқынды дамуда және бұл дамуды әйелдердің қатысуынсыз елестету қиын. Manshuq авторы Перизат Кәрімқұл Bilim Group холдингінде қызмет ететін үш әйелмен тілдесіп, IT салаcына қалай келгені, оларды жұмыста не шабыттандыратыны және неліктен бұл сала олардың кәсіби таңдауына айналғаны туралы әңгімелесті.
Перизат Кәрімқұл
6 мамыр 2026
Дүниежүзі бойынша технология саласындағы әйелдер үлесі әлі де аз. БҰҰ зерттеулеріне сүйенсек, олар әлемдік технологиялық жұмыс күшінің шамамен 29%-ін құрайды, ал компания басшыларының арасында бұл көрсеткіш 14%-тен аспайды. IT мен цифрлық мамандықтарға деген қызығушылық артқанымен, әсіресе шешім қабылдау деңгейінде гендерлік алшақтық айқын сезіледі. Wonder Women ұйымы жүргізген еліміздің IT секторындағы гендерлік теңгерім туралы алғашқы ауқымды зерттеуге сәйкес, қазақстандық әйелдер IT индустриясын белсенді игеріп келеді. Әйелдер IT компания қызметкерлерінің 43%-ін және желілік басшылардың 48%-ін құрайды. Дегенмен, жоғары буын лауазымдарының тек 22%-і әйелдердің еншісінде, ал мансабын осы салада бастағандардың тек 1,4%-і ғана топ-менеджмент деңгейіне дейін көтерілген. Сонымен қатар IT нарығының өзі де үлкен өзгеріс кезеңін өткеріп жатыр. Егер бұрын бұл сала тек бағдарламалау мен инфрақұрылым ретінде қабылданса, бүгінде ол өнім менеджменті мен деректер аналитикасынан бастап, пайдаланушыларды зерттеуге дейінгі ондаған бағытты қамтиды.
Қазақстанда да IT бағыттардың түр-түрі қарқынды дамып келеді. Соның бірі – технология мен білім беру саласын тоғыстырған EdTech саласы. Елімізде бұл бағыттың қарқыны жоғары: мектептерге, жоғары оқу орындарына және жеке дамуға арналған цифрлық қызметтер мен өнімдер көптеп пайда болып жатыр. Бұл нарықта 15 жылдан астам уақыт бойы жұмыс істеп келе жатқан Bilim Group холдингі еліміздің білім беру жүйесін оңтайландыратын өнімдер жасақтап, отандық EdTech саласының дамытуына ықпал етіп отыр. Қазіргі таңда холдингте 188 әйел жұмыс істейді. Бұл мақалада өмірін IT-пен байланыстырған Зәуре, Маржан және Даминаның кәсіби жолы жайлы айтпақпыз.
