Әке жолын қуған Дінзухра Нұрғисақызы туралы не білеміз

Manshuq

10 қыркүйек 2026

Дінзухра Нұрғисақызы Тілендиева – дирижёр, Қазақстанның еңбек сіңірген қайраткері және Нұрғиса Тілендиев атындағы «Отырар сазы» академиялық фольклорлық-этнографиялық оркестрінің көркемдік жетекшісі әрі бас дирижері.

Дінзухраның есімінің өз тарихы бар. Ол дүниеге келгенде әкесі Нұрғиса Тілендиев Дінмұхамед Қонаевтың үйіне барып, қызына оның есімін беруге рұқсат сұраған. Осылайша Дінмұхамед пен оның жары Зухраның есімдерінен Дінзухра есімі пайда болған. Алайда құжатында анасы таңдаған Динара есімі жазылған. Сондықтан оның екі есімі бар: күнделікті өмірде оны Динара немесе Дінзухра деп атайды, ал сахнада Дінзухра есімін қолданады.

Дінзухра туғаннан музыкаға «шомылып» өсті деуге болады. Ол бес жасынан бастап Алматыдағы Күләш Байсейітова атындағы музыка мектебінде оқыды. Алғашында скрипка класына қабылданғанымен, Нұрғиса Тілендиев қызының фортепианода ойнағанын қалап, оны пианино класына ауыстырған. Сегізінші сыныптан кейін Дінзухра өз қалауымен домбыра үйрене бастайды. Кейін Құрманғазы атындағы Қазақ ұлттық консерваториясында дирижер Төлепберген Әбдірашевтің класында білім алды.

Нұрғиса Тілендиев өмірден өткен кезде Дінзухра небәрі 13 жаста еді. Кейін консерваторияда оқып жүрген кезінде әкесі құрған «Отырар сазы» оркестрінде тәжірибеден өтіп, оқуын аяқтағаннан кейін Күләш Байсейітова атындағы музыка мектебінің оқушылар оркестрінде жұмыс істеді. Одан кейін «Отырар сазына» келді. 2009 жылдан бері Дінзухра Тілендиева оркестрдің көркемдік жетекшісі және бас дирижері қызметін атқарып келеді.

Дінзухра өзі дирижерлікті әйелдер мен ерлерге бөліп қарастырмайды. Оның айтуынша, Қазақстанда әйел дирижерлер аз болғандықтан, көпшілік оларды әлі де ерекше қабылдайды. Ал шығармашылықта адамның жынысынан бұрын қабілеті мен еңбегі маңызды.

Бүгінде Дінзухра жетекшілік ететін «Отырар сазының» репертуарында Құрманғазы, Қазанғап, Тәттімбет, Нұрғиса Тілендиев сияқты композиторлардың шығармаларымен бірге классикалық және заманауи туындылар да бар. Оркестр Қазақстанда ғана емес, көптеген шет мемлекетте өнер көрсетіп жүр. 2025 жылы Нұрғиса Тілендиевтің 100 жылдығына орай ұжым Париждегі ЮНЕСКО штаб-пәтерінде концерт берді.

Дінзухра бүгінде әкесі негізі қалаған «Отырар сазы» оркестрін басқарып, Нұрғиса Тілендиевтің шығармаларын жаңа буынға таныстырып жүр. Оның айтуынша, кейінгі жылдары оркестр концерттеріне келетін жастардың саны да артқан. Дінзухра мұны жақсы өзгеріс деп қабылдайды және «Отырар сазының» бұрыннан қалыптасқан дәстүрін сақтай отырып, заманмен бірге өзгеруіне мән береді.