Cуретші Мөлдір Қарубайқызының туындыларындағы әйел мәселесі.
Мөлдірдің мөлдір өнері
Қарапайым әрі терең, нәзік әрі қанық, таныс әрі жұмбақ. Мөлдір Қарубайқызының туындыларын осылай сипаттаса болар. Суретшінің кейінгі жұмыстарында адам бейнесін көрмейсіз. Алайда туындыларының барлығы дерлік адам, оның ішінде әйел әрі ана болмысын тануға талпындыратын символ мен бейнеге толы.
Мөлдір өте сезімтал әрі еңбекқор суретші. Содан болар оның әр кезеңдегі жұмыстары бір-біріне ұқсамайды және ішкі түйткілді дөп жеткізеді. Сондай жұмыстар сериясы — «Жеті апа». Аты айтып тұрғандай, жиырмаға жуық жұмыстың басты тақырыбы — әйел мәселесі.
«Жеті апа» №4
«Жеті апа» сериясындағы жұмыстар вульваны (автор дәлме дәл аударманы көп іздеп, ақыры осылай қалдырды) еске салады. Қоғамда әлі күнге ұят әрі ерсі көрінетін бейне арқылы суретші әулет әйелдерінің нәзік байланысын шебер жеткізген. Сериядағы барлық жұмыс Мөлдірдің өзі мен қызы, анасы мен апалары жайлы толғаныстан туған туындылар.
