Көктем туды! Алда бәріміз асыға күтетін Наурыз мейрамы келе жатыр. Мереке қарсаңында нағыз қазақи толқында болғыңыз келсе, 15-16 наурыз күндері Алматыдағы Sadu Arena-ға бас сұғыңыз. Мұнда ұлттық нақыштағы киім-кешек, әшекейлер, қолөнер туындылары сатылатын жәрмеңке, арт-кеңістік пен жанды музыканы бір жерге тоғыстыратын Ethno Pop-Up Store өтеді.
Manshuq оқырмандарына әнші әрі Ethno Pop-Up Store-дың негізін қалаушы Динара Сұлтан бұл жобаның қалай басталғанын, шараға қатысатын брендтердің қалай таңдалатынын және 2022 жылдан бері этно-стильге деген көзқарас қаншалықты өзгергенін баяндап берді.
Гүлзада Ксан
5 наурыз 2025
Кезінде Динара Сұлтан Қазақстан атынан көптеген ән байқауына қатысты, талайында жеңіске жетіп, біздің өнерді әлемге паш етті. Сол кезде мәдениет саласында жүргендер Динараны байқауларға біліп жіберген сияқты. Ән айта алатындар көп, бірақ білдей бір елдің атынан шығып өнер көрсету үлкен жауапкершілік пен үлкен махаббатты қажет етеді. Динараның он бес жыл бұрын айтқан әндері де, қазір айналысып жүрген ісі де елге, жерге, өнерге, мәдениетке және халыққа деген махаббатқа толы.
Әнші 2022 жылы ұлттық өнер мен жергілікті шеберлерді қолдап, алматылық тұрғындар мен қала қонақтарын қазақ мәдениетімен таныстыру мақсатында Ethno Pop-Up Store жобасын бастаған еді. Бір жағынан жәрмеңке сияқты, екінші жағынан мұражай немесе көрме дерсің. Ұлттық нақыштағы киім-кешек, зергерлік бұйымдар, ыдыс-аяқтар мен басқа да дүниенің бәрі бір жерге жиналған. Бастысы – бәрі өзіміздікі. Өндірістікі. Бағасы да жақсы. Көздің жауын алады. Ұлыстың ұлы күні – Наурыз қарсаңында өткелі жатқан Ethno Pop-Up Store-ды тиек етіп, жобаның негізін қалаушы Динара Сұлтанмен әңгімелесіп қайттық.
