Шымкентте әйелдер еңбегі мен кілем тоқу өнеріне арналған SHE RUG көрмесі өтеді

Manshuq 2 қараша 2026

6 қарашада Шымкентте SHE RUG 2026: Alone Together көрмесі ашылады. ShyraQ әлеуметтік кәсіпорны ұйымдастырған жоба қазақтың дәстүрлі кілем тоқу өнері мен заманауи өнерді бір кеңістікте тоғыстырады. Көрменің басты тақырыптары – мәдени жады, әйелдер еңбегінің құндылығы, ұрпақтар сабақтастығы және адамдар арасындағы байланыс.

12 желтоқсанға дейін жалғасатын көрмеде он заманауи суретшінің жұмыстары, ShyraQ Studio туындылары және тарихи тоқыма үлгілері ұсынылады. Ұйымдастырушылар кілемді тұрмыстық бұйым немесе интерьер элементі ретінде ғана емес, ғасырлар бойы жинақталған білім мен тәжірибені сақтайтын мәдени мұра ретінде қарастыруға шақырады.

Көрменің Alone Together («Бірге, бірақ жалғыз») атауы қазіргі қоғамдағы қарама-қайшылыққа назар аударады. Цифрлық технологиялар адамдарға үздіксіз байланыста болуға мүмкіндік бергенімен, бұл әрдайым шынайы жақындықты білдірмейді. Ал кілем тоқу секілді ортақ еңбек адамдарды біріктіріп, білім мен тәжірибенің бір ұрпақтан екіншісіне берілуіне жағдай жасайды. Жоба аясында жасанды интеллект дәуіріндегі қол еңбегінің құндылығы да талқыланады. Бүгінде цифрлық құралдар дәстүрлі өрнектерді бірнеше секундта жасап, шексіз көбейте алады. Алайда олар шебердің жылдар бойы жинаған тәжірибесін, материалмен жұмыс істеу дағдысын және әр туындыға жұмсаған уақытын алмастыра ала ма? Көрме келушілерді осы сұрақ төңірегінде ойлануға шақырады.

SHE RUG жобасының тағы бір маңызды бағыты – ауыл әйелдерінің еңбегін қолдау. ShyraQ ауылдағы кілем тоқушы шеберлермен тікелей жұмыс істеп, дәстүрлі қолөнерді қазіргі дизайн және өнер салаларымен байланыстырады. Әлеуметтік кәсіпорынның мақсаты – кілем тоқу өнерін сақтап қана қоймай, әйелдердің кәсіби тәжірибесін бағалауға, олардың тұрақты табыс табуына және экономикалық дербестігін нығайтуға мүмкіндік жасау.