30 наурызда Алматыда суретші және куратор Аида Әділбектің «Талқан, тары, топырақ» атты жеке көрмесі ашылды. Оның көркемдік және зерттеушілік тәжірибесі мәдени кодтар мен күнделікті тұрмыс элементтері арқылы әйел болмысын ұғынып қабылдау идеялары төңірегінде дамиды. Manshuq авторы Ася Әкімжанова суретшімен көрме, сәйкестілік және отбасы туралы әңгімелесті.
Ася Әкімжанова
11 шiлде 2023
«Талқан, тары, топырақ» көрмесі суретшінің отбасы, салт-дәстүр, анадан қызға, әжеден немереге жалғасатын білік туралы, ойтолғамы туралы әңгімелейді. Көрмеде «Жеті қарақшы» фотосериясы, «Бата беру» атты бата мен тілектер жинағы, «Көбелек» бейнемонологы, сондай-ақ орталық туынды – «Алақан» қысқаметражды деректі фильмі назарға ұсынылған. Фильмде Аида анасы мен әжесінің үйреншікті, үйдегі шаруасын бақылап, әйелдердің күнделікті еңбегі емдік жораға айналатын сәтті зерттейді. «Алақан» фильмі 2022 жылы Германияда documenta fifteen халықаралық көрмесінде өткен DAVRA орталық азиялық зерттеу тобының көпшілікке арналған бағдарламасы шеңберінде іске асырылды.
Өзім туралы
Мен өзімді мультипән суретшісі және куратор деп атаймын, бірақ алғашқы алған білімім теориялық болды – мен өнертанушы мамандығы бойынша оқыдым. Мен үшін бұл өнерді әртүрлі форматта бірқалыпты оқып зерттеген тамаша төрт жыл болды – осы тәжірибе мамандық таңдауыма және әрі қарай немен айналысқым келетінін түсінуіме көмектесті. Сол кездің өзінде Жүргенов атындағы Қазақ ұлттық өнер академиясындағы оқытушым әрі кураторым Юлия Сорокина: «Саған мұны еш жерде үйретпейді, мұны тек машықтану арқылы ғана үйренесің» деп маңызды кеңес берген болатын. Сол кезде жаңа ғана ашылған «Көркемөнер ишараты мектебінде» өзімді сынап көруімді ұсынды. Осылайша менің көркемөнер және кураторлық мансабым басталды. Бұл менің алғашқы практикалық тәжірибем болды, содан кейін мен өзімді белгілі бір шеңбермен шектегім келмейтінін және тәжірибе кең ауқымды әрі икемді болуы мүмкін екенін түсіндім. Өзіңнің барлық идеяларыңды әртүрлі салада әртүрлі медиум арқылы іске асыруға болатыны туралы ой көкейіме қонымды.
